本周二，亚冠联赛1/4决赛对阵抽签结果出炉。东亚区方面，两支中超球队广州恒大和上海上港“果然”被抽到了一起。
夜里，前两周那位在电话里向我激烈吐槽足协新政的友人又来电话了。。。
友人：喂，娄兄啊，侬讲亚足联啊是成心要捺阿拉中超球队做忒一支？成心要帮牢日本人进亚冠四强？迭个算啥抽签啦？
我：哈哈哈，侬老兄啊是看阴谋论个书看了多了是伐？抽签嘛本来就是碰运道呃呀。。。
友人：瞎讲！啥碰运道？断命亚足联当阿拉是戆大啊？啥人弗晓得抽签侪是装样子？乒乓球一只冷，一只热，绝对闭了眼睛做手脚好伐。。。
我：哈哈哈，朋友，我晓得呃，中国人民侪希望看到两支中超球队对牢两支日本球队。。。（友人插话：个么侬呢？）我是无所谓呃。侬想呀，既然东亚区剩下来只有中国2支、日本2支，个么弗管哪能抽法总归侪要碰着呃，早点晚点搭界伐啦？
友人：侬意思是亚足联呒没阴谋咯？
我：我是老弗欢喜啥阴谋论呃，真呃。讲句老实闲话，亚足联假使真个有啥阴谋论个想法，当初就弗应该捺东亚区交西亚区拆开来，看牢大家绕牢亚洲飞来飞去多少好白相？还有澳洲来，对伐？侬想想看，礼拜六侬踢国内联赛，礼拜天侬就要飞阿拉伯国家，礼拜三或者礼拜四飞回来，周末又要踢国内联赛，接下去侬还要飞一趟墨尔本，迭个算阴谋论伐？
友人：照侬迭个讲法，阿拉还要感谢亚足联做了粧好事体咯？
我：呵呵，我只是想讲大家覅老是觉着有阴谋，覅老是觉着有人要欺负阿拉。实际廊厢现在个小组赛分组，东西亚分开之后弗已经是中日韩三家人家全面对抗了嘛？
友人：个么阿拉中国人总归侪想看到两支中超球队会师决赛呀。。。
我：哈哈哈，兄弟啊，道理是呒没错，但是赛制弗是迭能介安排呃呀。。。侬想呀，奥运会乒乓球为啥中国选手能够会师决赛？因为从最早抽签开始就按照世界排名帮侬排好了呀，啥人上半区，啥人下半区，弗到决赛碰勿着！侬亚冠联赛就弗对了，淘汰赛阶段每一轮侪是重新抽签，抽到抽勿到侪是百分之50，对伐？所以我讲，呒没必要硬劲去讲啥阴谋论。
友人：个么我问侬最后一只问题。侬讲，足球里厢到底有阴谋论伐？
我：哈哈哈，当然有。。。哪能会的呒没呢？？？侬只要去问问一眼赌球个人就晓得了，侪是假球！！！为啥啦？？？因为伊拉呒没赢着钞票呀。。。我还是迭句闲话——心态最重要！！！否则侬讲，侬开车子连牢吃三只红灯算勿算阴谋论？
友人笑：侬只赤佬，好像倒是有眼道理。。。
（声明：本文仅代表作者观点，不代表新浪网立场。）
